Листи…

I. Слово с привылья Короля Владислава Барнинского выбранное. 1443

А прото кядыж за ласкою и справою духа светого церковь Восточная набоженства Греческого и Русского, которая ахнестысь, через час долги в-неякой разности и в-расколе веры светое, и светых сакраментов, не без утраты, изгубы многих спасению одъединости, светое Рымское церкви, хвеялася, которое единости, отцеве наши и овшем увесь люд Католический за часов наших видети же дали, тепер вже за милосердьем Божим и сузнаньем светейшего Пана Евгения Папы четвертого и иных многих отец веры светое горливых з-оною светою Рымскою и вселинскою церковью, преведена есть до единости давно пожеданое, а для тогож абы тая церковь Восточная и ее приложеные и все духовенство набоженства Греческого и Русского, в шырокости Панств наших и панованью нашему подлеглых, а где кольвек мешкаючи, которые и первой за тою разностию и розорваньем не яко утисненье поносили. А бы за прыверненьем им вольности хвале Божой служити, и ласки Збавителя нашого, о спанение верных душ. И светое веры утверждение в-сладости покоя об-фитей просити могли. На честь и на память Бога вседержителя, который нас откупил дорогою своею кровию, всим церквам и их Епископом, альбо владыкам, приложенным духовным и иным особам церковным тогож набоженства Греческого и Руского тые вси права волности, способы звычаи, и всякие свободы вечными часы дати позволили есьмо, и тым листом нашим позволяем, таких же яковых в Кролевствах наших Польском и в Венгерском вси костелы, и их Арцибискупове, Бискупове, приложеные, и иные особы костельные, звычаю Римского церкви заживают из них веселятся. А над то хочем мсти, и сим листом нашим сказуем, а бы от сего часу жаден з-дикгнитаров, старост, врядников и обывателей панств сподданных наших, якогож колвек стану и достоинства быти мели. Азвлаща Королевства нашого Польского Верхуменского, а особливе земель наших Руских и Подольских, и иных прилеглых, владцы пререченных Епископов, владык, и иных преложоных тогож набоженства Греческого и Руского, а ни судов их поповских, азвлаща в справе разводов малженских, от сего часу нияким способом не прекажали, хотя бы теж и невем якие звычае в землях помененных противные до селя заховалися ино тому противни быти не мают. А надто абы тыеж Епископове, албо Владыкове, и иные приложенные особы церковные, помененного набоженства Греческого и Руского маючи слушное поживенье ку отправлению хвалы Божое, тым способнейшие быти могли, им самым, и их церквам всим, где кольвек в панствах наших будучим, вси села и державы якиеж кольвек и якими кольвек имены названые которы з-стародавна до оных церквей належали, и через якиеж кольвек особы, и где кольвек в панствах и поветех наших аж деселя держаны суть зо всими их нравами побожною тихостью умыслили есмо привернути, якож и приворочаем сим нашим листом на часы вечные и потомные, а на сведецство тых речей и печать наша до сего листу нашего есть прывешено. Деялосе и дано в будцыно в пятницу близкую перед неделею третею великого посту. — Року Божого (1443).

II. Письмо Князя, Константина Острожского, Воеводы Киевского, Маршалка земли Волынской старосты Володымирского, к Ипатию, Епископу Володымирскому и Берестенскому, и ответы Епископа

Лист Княжати Его милости перший дати з Люблина Июня 21 дня року 1593.

Велебный, милостивый отче, Владыко Володымерский, Господине и приятелю мне вельцеласкавый.

Всяк человек, во всем времени жития своего, по спасении своем, должен есть тщатисе о сем, дабы мог быть размножителем и любовником фалы Божее. А ще же кто и до конца быть не может, ино, абы приобщителем, альбо участником быть мог, и я иж, за великими трудностями моими, маючи на собе бремя тяготивнншних вещей, хотя-ж не мог быть конечным милосником, и упразнителем, альбо забавцою, около помноженыя фалы Божее, однак же повинности моее християньское от давных часов была у мене хуть такая, которая и до тых часов еще неустает, и овшем ее роспаляет, а бых в таком упадку, знищенью и опущенью матки нашое церкве, светое, соборное, Апостольское, Восточное, угляжовал и розваживал и размышлял, упатруючы и вынайдуючы такий способ и початок и приступ, через который бы Церковь Хрыстова, всих церквей началнейшая, до першого своего пункту, целю и клюбы, прийти и застановити могла. Але як вижу достойными достойная созидати ее, и честными честная совершати ее обыче, и презгодных людей годные речы бывают справованы. Так же и мне, або в том несчастье загородило, а боли теж негодность в так высоце фалебных речах не допустила до того прийти, же бым куначалу якому благому тое речы повод слушный взяти мог; однак же я пред се почувалом в собе залог письма светого мовячого, сила Божия внемощи совершается, и зась от человек не возможная, Богу возможна суть на которые слова, яко на напевнейшый цел, пиледаючы, мало прешедших времен, не славы ради житейское, Бог весть, но не токмо ситующы падения церкве Хрыстовы, але и на ругания ради Еретик, и тых самых отторгнувшысе Рымлян, яже иногда нам, беша братия, дерзнув або важыл се есми был спасевином Папы Рымского о некоих нужных речах писания светого, не сам, но своими старшыми и презвитери совитоватни гадательствовати. Богу же неизволившу, нашея ли ради пользы, и блага, или зла, не вем, и тако собысть се, яко годе Богу, бе. Я и тепер не могучи устать от такового тщания, яже о церкве Божые лмаючы, тот пред се взятя своего умысл, абыж до там тых краин, в которых по недалеку обретает се и Папа Рымский, для улеченья здоровя своего телесного, на час некоторый отехать мог, там же, если бы было на то прозволение Божие, до того, если бы была на то воля вашей мости, нашых Духовных, жебы сте вельможы теперь на том соборе вашом духовным вси одностайне о том промышляли и радилы и на мовяли, абысе мог такий прыступ вынайти до такового поводу, через который бы ее могли склоняти початки, дозгоды, и улацненья, и померкованья; так великих незгод и заятреня а праве внутр нее брани вцеркве Божой. Где был и я, втых краех будучи, за помочью Божею, и за началом и благословенством Вашей мости, яко духовных, не за нехал з щырости и хути моее против церкве Божой старанья, я зна болшым усилованьем моим, такового чинити, якое бы можность и годность моя зносити могла, иж бы се доякое слушное згоды изедноченья схилиты могло. Якож здаетми се за реч слушную, же бысь вельможне-милостивый отче, Епископе Володымерский, сам, особою своею намовившыся, з его милостью преосвященным отцем Архиепископом, из их милостью, велебными Епископы, до